رواية تعافيت بك ل شمس محمد

 

كلام دكاتره ..

المريض المصرى ابو دم خفيف بعد ما يسأل الدكتور كل الأسئله الوجوديه التى تخطر او لا تخطر على باله سواء كانت تخص مرضه أو مرض عياله أو مرض جيرانه .. المهم ياخد أكبر قدر من المعلومات قبل ما يمشى .. ولما حد يسأله عملت ايه عند الدكتور .. يقوله بكل بساطه .. سيبك منهم ولا هاعمل أى حاجه من إللى قالولى عليها .. دا كلام دكاتره .. 

الطريف فى الموضوع أننا كلنا عارفين كدا .. وبنعمل كدا .. باختلاف تعليمنا وثقافتنا وطبقاتنا الاجتماعيه .. لكن ايه السبب.. حقيقى لا أعلم .. 

فاجأني اليوم مريض مسن تجاوز السبعين عاما .. يناديني من بعيد أثناء دخولى العمليات ..

 تعالى يا أبله عاوز أسألك سؤال.. فأجبته بغض النظر عن أبله دى .. بس تحت أمرك يا حاج .. قالى بالذمه يعنى لما اكون بدخن سجاير بقالى خمسين سنه .. وعشان هاعمل عمليه .. يقوم الدكاتره يطلبوا منى ابطل تدخين لمدة كام يوم قبل العمليه .. والا يأجلوها .. طب دا كلام دكاتره كبار والنبى ..

 قولتله وايه الغلط فى الكلام ده يا عم الحاج.. قالى يعنى بعد ما السجاير عملت اللى عملته طول السنين اللى فاتت دى .. هما بقه الكام يوم دول اللى هيحلو المشكله.. 

قولتله والله كلام زى الفل.. لكن مدام اخترتني من بين كل الناس وسألتني وكمان قولتلى يا أبله.. خلينى بقه اشرحلك .. 

التدخين طبعآ أثر على صحتك وعمل حاجات مش هنقدر نخلص منها فى كام يوم صحيح زى ما بتقول .. لكن الفتره البسيطه دى لو وقفت فيها التدخين هتدى فرصه لدمك انه يتخلص من الدخان والمواد الضاره قدر المستطاع وينشط الدوره الدمويه قبل ما تدخل العمليات .. وكدا النتيجه تبقى أحسن .. 

ها فهمتنى وهتسمع كلامى ولا هتقول كلام دكاتره وسيبك منهم..

قالى لا خلاص فهمتك واقتنعت .. قولتله تمام .. هات بقه سيجاره.. ضحك المريض بصوت عالى وقالى كان عندى حق لما اختارتك انتى بالذات عشان أسألك يا أبله .. 

تانى أبله .. لله الأمر

#د.دعاء جلال.. أستاذ طب المنصوره...يوميات طبيبة تخدير