هل الإنسان مسير أم مخير*بقلم أسماء رشدي مقال خاص بجريدة حبر الحياة

 جريدة حبر الحياة. 

حوار صحفي مع الكاتبة غادة أحمد رمضان 

ويأتي الليل فتخرج النجوم من خلف الغيوم؛ لتسطع، واليوم زاد عالمنا نجمة جديدة، معنا اليوم شاعرة جميلة تألقت بمعنى كلماتها وأسلوبها البراق وهي:

 

الاسم: غادة أحمد رمضان عشماوي كلديش

العنوان: القليوبية_قليوب البلد 

السن: 18 إلا 3 شهور

إيه هي موهبتك؟ 

كاتبة وشاعرة 

وإزاي اكتشفتيها؟ 

من صغري 

كنت بمسك كشكولي عادي وأكتب كلام كتير، ومن 3 سنين كنت بنزل خواطر على الفيس بوك عجبت ناس كتير، من هنا بدأت ألتفت للكتابة، واتطورت وعملت اسم، وبعدين بقى ليا جمهور حتى لو عدد قليل، والسنة اللي فاتت بدأت أكتب شعر وحققت نجاحات كتير في آخر 2021 

وروحت حفلة فالتانية فالتالتة وبقيت أتطلب من عدة محافظات. 

وإزاي عرفتي تنمي موهبتك؟ 

طورت من نفسي طبعًا، قرأت كتير جدًا ومستسلمتش للوقعات. 

إيه هي العقبات اللي واجهتيها أثناء رحلتك في تطوير موهبتك؟

لأ كتير أوي منها إني بكتب على صفحتي على الفيس بوك، كنت كل ما أعمل جمهور وأنزل كتابات صفحتي تتقفل، ومنها انتقاد الغير بس بشكل مؤذي، ومنها إني في ثانوية عامة السنة دي وكده فعشان أركز على ده وده شيء صعب في حد ذاته لكن مبطلتش. 

 

ومين أكتر حد كان بيشجعك؟ 

بابا، على الرغم إنه كان قلقان عشان ثانوية عامة السنة دي؛ لإني الأول كنت بكتب بس دلوقتي شعر والحمد لله حفلات، والموضوع زادت اهتماماته.

وروان بنت عمتي صاحبة عمري، وأصحابي. 

أهم أعمالك؟ 

اشتركت في مسابقات زي إيڤريست، واشتركت فيها السنة دي للمرة التانية بس المرة الأولى كنت ظهور بس مش متسابقة. 

روحت حفلات كتير في مكتبة مصر العامة وفي الربع الثقافي، ليا كتاب مجمع خواطر اسمه شتات وهيكون موجود في معرض القاهرة السنة دي. 

إيه هي نصيحتك لمن دخل مجال الكتابة؟

إنه ميحتكش بالوسط، وإنه يقرأ كتير أوي طول ما هو قاعد يقرأ، وإنه مهما عِلي فهو لسه موصلش؛ لأن طريقنا ملهوش نهاية، وإنه مياخدش الانتقاد بجدية لأنه مش دايمًا في صالحه؛ ساعات ناس كتير بتحب تهد الكيان اللي عملته فعشان كدا ميسمعش لحد كل اللي هيعمله إنه هيطور نفسه ويشتغل على نفسه جامد أوي؛ عشان يوصل صح، وأقول إن اللي وصلنا له ده مش بالساهل لأ ده تعب وتعب كبير أوي، وأهم حاجة الصبر. 

ولك عزيزي القارئ جزء من جمال كلماتها:

لما أموت 

لما أموت اوعوا تنسوني

لبسوني الأبيض بابتسامة

جوا قلبي شيلت حزن

موت تارك ميت علامة 

الحكاية مُرة جدًا

وقت نومي الفجر يدّن 

أسمع ميت مليون سلامة 

كفنوني بِالقماش جِسمي قطن ملفوف في شاش 

واللي حبيته يوم

 يوم مَماتي جه؟ مجاش

أوضتي بس عارفة إنّي كنت طيب.. مش بخير 

طيبتي ياما غرقتني والموضوع ملهوش بديل 

كل اللي احتجت له يوم

وقالي نِفسي تكون بخير 

لما جيت أعاتب

 قالوا ياما 

قالوا عني مش أصيل 

سابوني وحدي بين أربع حيطان 

مستكفوش.. وقفلوا كل البيبان 

كل حبي كان ليهم قَسّتهم عليا الأيام 

عِشت وشوفت اللي مِن دَمي يكرهوني بِالهميش 

خَدوا حلمي كسروه حَبسوه جوا نيش 

كملوا عليا أكتر كل ده ميهمنيش 

اللي دَغدغ فيا حلمي نسي إِنّه حلف ميئذنيش

إِزاي مبكيش مِن الحُرقة

 مِن اللي شوفته مِن اللي ِمنّي 

صِعبت عليا نفسي لما  الكل نام سايبني 

خيروني ما بين حضوري غايب

أو أكون عايش بِطولي 

مسكت فيهم قالوا سايب 

بس خلصت وجه دوري 

هششوا عضمي بدري بدري 

ملامحي سالت في كف إيدي 

هو ده شكلي؟

دم مين اللي في وريدي! 

أقفل عليا ويزيد خوفي مِن بكرة 

أحلم في عز نومي بالهروب 

أصبح محبوس جوا حجرة

مِن حياتي أكون مسلوب 

أبويا راجل شهم أصيل 

استحمل بوزن النيل 

لو طلب عيني لأسنده

ومسمحلوش على غيري يميل 

غرّبته المشاكل والظروف 

وغير تعبه مش بشوف 

كان بودي أكمل مسيرتي 

ولا أرضَاله يعيش مكفوف بانهياري

عاش يشيل من حمولي

عاش ينجدني وياخدلي تاري

غرّبتنا الأيام وزاد جوايا الكلام 

عِشت عُمري كله أدي  وأديني ماشي بسلام 

محدش لُه عليا جميل

ولا سابولي شيء أفتكره 

كله خبط.. شوه اللي كان جميل

 ومفيش غير كام موقف يتذكروا 

أنا مش مريض ولا تعبان أنا حد فِهم الدنيا 

كل ما أمشي في طريق طَبعي يهدّه في ثانية 

كان عيبي الوضوح ونِيتي الصافية 

عشت بدوق المُر فَالتجربة كافية 

خطي رسم محيط أوجاعي

ومروري جواه كان أكيد 

كان ممكن يِنجدوني بقشة

ولا يسمحولي أكون وحيد

القائم بالحوار: رشا أسعد فوزي