_ أهلًا بيكي، ممكن تعرفيني عليكي!
=أهلا بيكي أكيد، أنا شيماء مدبولي لقبي روح من أسكندرية عندي عشرين سنة بدرس فكلية آداب قسم لغة عربية وحالياً بحول لقسم إعلام.
_إيه موهبتك أستاذة شيماء؟
= بفتخر إني موهبتي الأولى هي الكتابة ووصلت فيها لمستوي فخورة بيه جداً ، ولكن عندي مواهب تانية زي حبي للأشغال الهاندميد إلي خلتني قدرت فسني أفتح ستور خاص بيا وشغفي بالتجميل إلي وصلني لإني أكون ميكب ارتست.
_جميل جدًا، هل قدرتي توفقي بين كل مواهبك وتنميها في وقت واحد؟
= أوقات كتير قصرت فحق موهبة منهم على الأقل، ولكن دلوقتي أنا بقيت قادرة أقسم وقتي بين شغلي فالعلاقات العامة ودراستي ومواهبي الحمدلله.
_كلميني عن إنجازاتك في مجالك الأول الكتابة..
= بكتب من حوالي ٦ سنين، فيهم قدرت أنمي موهبتي كتير واكتب كل الألوان من شعر لرواية لنثر لغيره، كان من أهم الإنجازات بالنسبالي إني قدرت أقرأ كم كبير من الكتب والروايات فوقت قليل واستفاد بيهم، غير أكيد إني حبيت أساعد أي حد حابب يبدأ فمجال الكتابة فأسست كيان لتعليم الكُتاب أساسيات الكتابة وتمكينهم منها والحمدلله كيان هَوَسّ دلوقتي أسمه معروف فالوسط الكتابي ومعروف علي كل السوشيال ميديا..
_عظيم، هل قابلتك صعوبات في بداية تأسيسك لكيان هَوَسّ؟
=قابلتني كتير جداً، المنافسة كانت قوية وقتها بين الكيانات الكتير إللي ظهرت مرة واحدة بس بفضل ربنا قدرت أنا والتيم عندي نثبت نفسنا فكل تحدي اتحطينا فيه وقدرنا بقدر الإمكان نبعد عن مشاكل الوسط الكتابي الكتير إلي مبتخلصش..
_مين أول داعم ليكي واللي كمل معاكي في مسيرتك الأدبية؟
= ديما كل شخص لينا عنده شخص مهم بيدعمه ديما بس انا حابة اخليه يفضل مجهول الهوية، وأكيد والدتي كانت دايما فضهري وبتقويني فكل خطوة..
_اي الانجازات اللي حققتيها لحد الآن من بداية تأسيسك للكيان؟
= اتعاقدت مع جريدة لنشر كتابات التيم عندي وكمان وفرت للبنات ورشة كتابة لغوية وبحمدلله كلهم استفادوا بيها وحالياً بنجهز عشان نظهر فالمعرض قريب وبحاول أوفرلهم فرص أكتر لإن سعادتهم مهمة عندي و بتخليني مبسوطة.
_بالتوفيق ي جميلة، كلميني عن طموحاتك وانجازاتك القادمة لو هتحبي تعلني عنها.
= وفقنا الله جميعاً، بحضر حالياً لأول ورشة كتابة تحت إشرافي الكامل وهتكون أونلانين وفأسكندرية مش مجرد ورشة أونلاين، وكمان هتكون ورشة مصورة شامله كل أركان الكتابة ومركزة فتحضيرات الورشة دلوقتي بشكل كبير عشان أقدم أحسن محتوى.
وعلى المستوي الشخصي بنمي نفسي فمجال الإعلام بالأخص فالعلاقات العامة وأخدت دبلومة إعلامية ومكملة فالمجال.
_ايه مميزات والصفات اللي لازم تكون موجودة في الكاتب المثالي من وجهة نظرك كمؤسسة كيان؟
=أهم حاجة إنه يكون عنده استعداد يتعلم ويكون بذرة الموهبة موجودة جواه عشان يقدر ينميها، وأكيد إتقان اللغة كويس جداً والخيال الواسع والإحساس المفرط و حسن التعبير والباقي سهل يكتسبه وينميه.
_ هل الكتابة موهبة ولا هواية عندك؟
= اتكلمت قبل كده عن الفرق بين الموهبة والهواية لكن المرادي هرد رد مختلف، سواء كانت هواية او موهبة ففكل الاحوال هي شئ جميل جداً وسواء كانت هواية فلابد من إتقانها أو لو كانت موهبة فلابد من تطوير الموهبة لأقصى مرحلة ممكنة.
_ اتفق، بدأتي امتى في مجال الكتابة؟
= بكتب بقالي ٦ سنين ولكن لو قولنا دخلت الوسط الكتابي وظهرت فيه أمتى فـ هيكون بقالي ٣ سنين بس.
_ هل دي كانت مدة كافية لمعرفتك لكل شيء في المجال ومعرفتك لكل التفاصيل وأساسيات النجاح عشان تكوني قادرة تأسسي كيان؟
= أنا بحس إني مختلفة عن غيري فنقطة المعرفة دي، يعني مثلاً أول ما بحط مجال معين فدماغي بكون فأقصر وقت ملمة بكل تفاصيله وبتعمق كمان وعندي فضول ديماً أعرف تفاصيل المجالات المختلفة فده شئ بيساعدني إني أقدر أدخل أي مجال وأثبت نفسي فيه الحمدلله.
_ عظيم، يشرفني أقرأ شيء من كتاباتك.
= الشرف ليا،
بداخلي هناك صوت دائما ما يعترض على كل شيء.
كل ما أريده بعد بضع ثوان تنتهي رغبتي له..
أرغب بشيء بشدة وعند اقترابي منه أشعر بأنني مللت، فأتركه وأرحل..
بداخلي هناك طاقة سوداوية تريد الانتقام من الكل، وطاقة أخرى تريد الخير والسلام.
فتم اندثار حرب بداخلي غير مدركين ما نتيجتها فلا أحد هنا بمهزوم سوى أنا.
فهل من حل يخلصني مِن زهدي لكل شيء أحببته يومًا!
هل من حل يخلصني من أفكاري السوداوية وحبي لكل ما هو مُتدَمر !
هل من حل يخلصني مني؟!
شيماء مدبولي➰
_بتقتدي بمين في الوسط الأدبي؟
= بحب اقرأ لناس معينة زي دكتوى حنان لاشين وعمرو عبدالحميد وأحمد خالد مصطفي لكن معنديش شخص معين بشوفه كقدوة ليا، مش بحب أحط سقف لطموحاتي ولو اقتضيت بحد هكون كده بحط سقف ليها.
_لو هنشوف كتاب لشيماء مدبولي هيكون بيتكلم عن إيه؟
= فالأغلب هيكون عن المشاكل النفسية الي بيمر بيها الشخص على مدار حياته وطرق علاجها ولو رواية هتكون دراما فانتازيا.
_ايه أكتر نوع كتابات متميزة فيه!
= مش أنا الي بقول بس القراء كانوا بيحبوا يقرأولي مشاهد"سكريبات" أكتر حاجة وأنا بحب اكتب اللون ده جدا..
_جميل، هل تعرفين جريدة حبر الحياة؟
= بالطبع ولي الشرف أن ينشر أسمي بها.
_الشرف للجريدة وكل من فيها علي الحوار الممتع وخاصة مع الكاتبة المبدعة ومؤسسة الكيان الصاعدة شيماء مدبولي
اتمني لك التوفيق الدائم.
= لي ولكِ يا جميلة، أنا من أسعدني هذا الحوار معكِ.
ـــــــــــــــــــــــــــــــــــــــــــــــــــــــــــــــ
كانت معكم الكاتبة والصحفية: إسلام إيهاب.
ــــــــــــــــــــــــــــــــــــــــــــــــــــــــــ
مؤسسوا الجريدة:
_أ/ عبد الرحمن عزام
_د / آية رمضان.
كل الشكر🤍🤍🤍
ردحذفما شاء الله دائما بتبهيرينا يا استاذه شيماء فعلا بفتخر اني واحده من الكيان بتاعك وكمان بشكر الصحفيه والكتابه الجميله إسلام إيهاب ❤️
ردحذف