يوم جديد وموهبة جديدة وموهبتنا اليوم كاتب وروائي وشاعر غنيّ عن التعريف، الكاتب: محمد خالد، من مواليد محافظة الإسماعيلية، حقق العديد من الإنجازات في ريعان شبابه،حيث تبلغ منه الحياة ستة وعشرون عامًا(26)، فلنتعرف عليه بشيء من التفصيل...
_ متى كانت بدايتك في مجال الكتابة؟
= منذ عشر (10)سنواتٍ تقريبًا.
_ هل الكتابة موهبة أم هواية حيالك؟
= موهبة، أنا شايف إنها فطرة من الله لأني أنا اتولدت بيها والحمدلله بشهادة كتير من الناس إني مميز عن غيري، وفي نفس الوقت هواية أيضًا.
_ ومن وجهة نظرك تصف الهواية بإيه؟
= الهواية هو دا الوضع الحالي، اللي مش عاجبني شخصيًا، أي حد بيكتب كلمتين بيعمل ديوان ويطلع حفلات ودا مضيع حق الموهبة.
_ أتفق، بعض الأشخاص في بداية طريقهم بيقابلوا مشاكل وصعوبات، فهل واجهتك صعوبات حتى الآن؟
= أكيد، مشاكل كتير، منها مثلًا أول ما بدأت كنت ضعيف في الكتابة وبتهاجم، ومرة الجمهور في مسرح الجامعة هتف ضدي وإني مش جدير بكتابة الشعر، بعدها بـ 6 شهور كانوا بيكسروا إيديهم من التسقيف لي الحمدلله،
_ هل أنت راضي بشكل كامل عن نفسك في الوقت الحالي؟
= النهاردة أنا بقيت واحد من كتير معروفين في الوسط ودا شيء مفرحني جدًا.
_ ازاي قدرت تتعامل مع المشاكل اللي بتواجهها؟
_ والله أنا بتخطى أي شيء يضايقني ومبديش أهمية ليه، وبحاول أتصرف باللي يرضيني، حتى لو كان اللي قدامي شخص معروف جدًا.
_ مين أكتر شخص داعم ليك في طريقك؟
= أمي ثم أمي ثم أمي أولًا، وبعد كدا ييجي شخصيات تانية.
_ أدامها الله لك، مين أهم الشخصيات اللي أثرت فيك في المجال الأدبي؟
= بحب جدًا مصطفى ناصر ومأثر فيا بشكل كبير، ومحمد إبراهيم شاعر محترم، وعلى مستوى الروايات دكتورة خولة حمدي ودكتور محمد طه، بحب جدًا أي حد كان له خير معايا بسيط.
_ احكيلنا عن إنجازاتك ونتشرف بيها حتى لو بسيطة.
= والله أنا شغال في أكتر من مجال مش بس الكتابة، يعني معايا ماچستير، وشغال مدرب كرة قدم، وعندي لاعيبة في أندية كبيرة، شغال ديزاينر وإن شاء الله عن قريب دكتور، ناس كتير تشوف دا مش كويس وتشوف إن التركيز في حاجة واحدة حاجة كويسة وأنا معاهم، لكن اللي مش كويس هو الإحباط وعدم المحاولة، وقمت بعمل ديوان تمر حنة معرض القاهرة الدولي للكتاب2022، ومؤخرًا قمت بعمل رواية كرسي اعتراف معرض القاهرة 2023، واتعلمت كتابة الرواية في سنتين، وحاليًا اتعلمت كتابة الاسكريبتات والقصص الصغيرة.
_ هل فكرت لوهلة أن تترك الكتابة؟
= مستحيل، أنا لقيت نفسي في الكتابة، وحتى لما باخد القرار دا يومين وبرجع تاني.
_ بتطمح بإيه في المستقبل؟
= بجهز شغل كبير جاي إن شاء الله، مش بس في مجال الكتابة، قريب بإذن الله هتسمعوا عني كويس.
_ وجه كلمة لكل شخص بينتابه الإحباط.
= كمل، وجرب وحاول في كل الطرق المفتوحة قدامك، في يوم من الأيام ربنا هيوفقك وهيجعل نصيبك في مكان تستاهله.
_ ايه الشيء اللي تتمنى إنه يكون موجود في الوسط حاليًا؟
_ احترام الموهبة الحقيقة، وأتمنى في يوم من الأيام يتعمل رقابة على الكتاب زي ما فيه رقابة على المطربين دلوقتي.
_ هل أسست كيان أو ماشابه؟
_ بالفعل أسست تيم (فريق) متعدد المواهب، ومعروف جدًا في الوسط حاليًا _ تيم على ناصية الشعر _
أخبرني عن الشخصيات اللي ساعدتك في بناء تيمك وكانت عامل مؤثر فيه.
= هقول تاني أمي هي العامل المؤثر الأول في حياتي، وبتساعدني كتير ومن غيرها مبقاش الشخص اللي أنا عليه دلوقتي، وفيه ناس كتير حواليا بتساعدني جدًا منهم الكاتبة والمصححة أ/ هاجر محمد عرفة، وشخصيات تانية مش حابب أذكرها بحتفظ بيها لنفسي.
_ لنرى بعض مما يبوح به قلمك.
كرسي اعتراف
الكرسي اللعين
شخصًا ما يُراقب الأفكار، ويجلس بجانب مقعد الكرسي الوحيد الذي يجلس عليه نفس الشخص الأول؛ يفعل كل ما يحلُ له، يتحكم في ردود الأفعال، يُصَدّر صورة سيئة لأقرب الناس، الأهل، الجيران، الأصدقاء، المجتمع، ومن ثَمّ يعود لنفس المكان بجانب الكرسي اللعين؛ الذي يضر بصاحِبه.
ـــــــــــــــــــــــــــ
أنا ..
علمت كل اللي إنحنى يصبح حديد
ولا طولت حد يودني
ولا كان لي إيد !
وفضلت باعد دنيتي عن أي شيء
وبعدت قاصد رغم حزني وضلمتي
ملقتش واحد جنبي حتى فى أزمتى ..
ــــــــــــــــــــــــــــــــــــ
_ صِف لنا روايتك وإيه المميز فيها عن غيرها.
= المميز فيها .. طريقة السرد والاضافات الجديدة والانفراد اللي موجود فى كل فصل من الفصول ..
التشويق اللي عملته جوا الرواية خلق فيها روح انك تبقى عايز ومستني تقرأ الفصل اللي بعده بفارغ الصبر عشان تعرف ايه الاحداث اللي بعد كدا
حقيقي انا فخور اني كتبت الرواية دي لانها مش مجرد رواية دي هتغير تفكير كل اللي جابها وقراها لان فيها جزء خاص بالذات ..
_ وفي نهاية الحوار تحب تقول إيه عن نفسك؟
= بشكر ربنا دايمًا وبقول الحمدلله على كل شيء، أتمنى من الله أن يكرمني ويكرم كل من حولي، ويديم عليا نعمة الأم والأخ والصديق الوفي والمحبين الصادقين، بشكر ربنا ثم أمي على اللي وصلتله، وبقول لكل واحد مجتهد أوعى تبطل تحلم اللي بتخسره النهاردة في سبيل سعادتك بكرة.
_ وفي الختام أتمنى لك دوام النجاح والمزيد من التفوق دائمًا.
ـــــــــــــــــــــــــــــــــــــــــــــــــــــــــــــــ
_كانت معكم المحررة الصحفية: إسلام إيهاب..
من جريدة حبر الحياة.
إرسال تعليق
اذا اعجبتك جريدتنا الرجاء وضع تعليق يسعدنا على تقديم المزيد