كيف بدأت رحلتك مع الكتابة؟ وما هو الدافع الرئيسي الذي جعلك تختار أن تكون كاتباً؟
.رحلتي مع الكتابة بدأت من وأنا صغيرة كنت بحب أعبر عن كل حاجة بالكلام المكتوب، حسيت إن الكتابة هي الطريقة اللي أقدر أوصل بيها أفكاري للناس وأحس إنها بتوصل لهم بصدق والدافع الأساسي كان حبي للقراءة وتأثري بالكتاب اللي كلماتهم لامستني من جوا.
هل كان هناك كتاب أو كاتب معين أثر فيك ودفعك إلى الدخول في عالم الكتابة؟
.أيوه، اتأثرت جدًا بأسلوب كتاب زي (د/ محمد إبراهيم لأنه عرفني إن الكلمة ليها تأثير كبير، وممكن تسيب أثر عند الناس حتى لو بعد سنين.
ما هي الموضوعات التي تجد نفسك مشدوداً للكتابة عنها؟ وهل هناك قضايا معينة تحب أن تتناولها في أعمالك؟
.بحب أكتب عن القضايا الإنسانية والمشاعر اللي جوانا، زي الصراع النفسي التطور الشخصي، والبحث عن راحة البال دائماً لأنها بتلمس واقعنا كلنا بشكل أو بآخر.
هل تعتمد على التخطيط المسبق عند كتابة رواياتك أو مقالاتك، أم تترك القلم يتدفق بحرية؟
.في العادي بحط خطة، يعني زي خريطة عامة، وبعد كده بسيب القلم يكتب بحرية بحس إن الأفكار الحقيقية بتطلع لما بتسيب نفسك تعيش اللحظة مع الكتابة.
كيف تصف أسلوبك الكتابي؟ وهل تأثرت بأساليب كتابية معينة أو حاولت تطوير أسلوبك بشكل فريد؟
.أسلوبي بسيط ومباشر، بس فيه عمق يوصل للقارئ، في البداية طبعًا وانا ببدأ أكتب كنت متأثرة بأساليب الكتاب اللي بحبهم، لكن حسيت ان لازم يكون ليا أسلوبي الخاص وبدأت أكتب بيه.
ما هي أكبر تحدياتك ككاتب؟ وكيف تمكنت من تجاوزها؟
.أكبر تحدي كان إني أواجه لحظات فقدان الإلهام أو إني أشك في كتابتي وإن ممكن أتعرض لنقد سلبي لكن اتغلبت على ده بالصبر، وبإني أفكر في الهدف من الكتابة وهو التأثير وإني أقدر أسيب رسالة حقيقية.. وبصراحة اللي كانت بتساعدني علي اني اكمل وبتشجعني وبشكرها جداً هي (حنين تيمور) صحبتي حقيقي.
حدثنا عن أعمالك المنشورة حتى الآن.. هل هناك عمل محدد تشعر أنه يعبر عنك أكثر من غيره؟
.لحد دلوقتي عندي "حين يعود الأمان"، لأني فيه حطيت جزء كبير من أفكاري ومشاعري، وركزت على التطور الشخصي والصراعات اللي بنواجهها في حياتنا.
كيف ترى دور الأدب في المجتمع اليوم؟ وهل تعتقد أن للأدب تأثيراً ملموساً في الواقع؟
.الأدب له دور كبير جدا في تشكيل وعي المجتمع، لأنه بيعكس واقع الناس وبيوصل أفكار ومشاعر ممكن تكون مخفية أو مسكوت عنها الأدب قادر يفتح عيوننا على مشاكلنا وحلولها بشكل مختلف وأوضح وكمان بيخلينا نعيش تجارب غيرنا، وده في حد ذاته بيغير في الواقع.
هل لديك طقوس معينة تتبعها عند الكتابة؟ وكيف تساعدك هذه الطقوس في التركيز والإبداع؟
.أيوه، بحب أكتب في وقت هادي بعيد عن الزحمة، وأحيانًا بحب أسمع موسيقى هادية تساعدني أركز. كمان بحاول أبعد عن أي حاجة تشتتني وأكون في مكان مريح عشان الأفكار تطلع بشكل أفضل.
كيف تتعامل مع النقد؟ وهل تلقيت نقداً معيناً ساعدك في تطوير أسلوبك أو رؤيتك؟
.النقد حاجة طبيعية لأي كاتب أو أي شخص عموماً، بس اللي بيفرق هو طريقة تقبلنا ليه. بحاول أخد النقد اللي يفيدني يمكن يساعدني أطور من نفسي وأتجاهل النقد الهدام اللي بيكون اللي بينتقد بيه عايز ينتقد وبس أو ده هدفه.
ما هي رؤيتك لمستقبل الأدب في العالم العربي؟ وهل تعتقد أن الكتابة تواجه تحديات خاصة في هذا العصر؟
.شايفة إن الأدب العربي قدامه فرص كبيرة في المستقبل، خاصة مع الانتشار السريع لوسائل النشر الحديثة بس في نفس الوقت الكتابة بتواجه تحديات زي السرعة اللي بقت موجودة في حياتنا، اللي خلت الناس أقل تركيزا في القراءة، وده بيحمل الكاتب مسؤولية إنه يكتب بأسلوب يشد القارئ من أول كلمة.
هل هناك موضوعات أو أفكار تعتبرها محظورة أو تجد صعوبة في تناولها في كتاباتك؟
.مفيش موضوع محظور بالنسبة لي بس أحيانًا في أفكار صعبة لأنها بتحتاج بحث وتفكير أعمق بس فوقتها هحاول أكتب كل حاجة بس بأسلوب يحترم عقل القارئ وثقافته.
كيف ترى تأثير التكنولوجيا ووسائل التواصل الاجتماعي على عملية الكتابة والنشر؟
.التكنولوجيا والسوشيال ميديا في رأيي سلاح ذو حدين من ناحية سهلت عملية النشر ووصلت الكتاب لأكبر عدد من الناس ومن ناحية تانية خلت المنافسة أصعب وزودت المحتوى السطحي الكاتب النهاردة محتاج يطور نفسه باستمرار عشان يقدر يتميز وسط الكم الكبير ده.
ما هي النصيحة التي تقدمها للكتّاب الجدد الذين يسعون لدخول عالم الكتابة؟
.نصيحتي ليهم إنهم يكتبوا من قلبهم، ويقروا كتير في كل المجالات، لأن القراءة بتطور الفكر والأسلوب وكمان ما يخافوش من النقد، لأن كل كاتب ناجح او شخص ناجح بدأ خطوة بخطوة.
ما هي مشاريعك القادمة؟ وهل هناك عمل جديد تعمل عليه حالياً؟
.مشروعي القادم هو تطوير من نفسي في المجال، بحاول أكون دايمًا شغالة على حاجة جديدة تضيف لرحلتي ككاتبة.
كيف توفق بين الكتابة والحياة الشخصية؟
وهل تجد صعوبة في تحقيق التوازن بينهما؟
.التوازن بين الكتابة والحياة الشخصية مش سهل أوي، خصوصًا إن الكتابة محتاجة وقت وتركيز كبير، وفي نفس الوقت الحياة الشخصية ليها حقوقها. بحاول أنظم وقتي وأحدد ساعات معينة للكتابة، وساعات تانية للحياة اليومية بس في النهاية، لما بحس إن الكتابة جزء من اليوم، الأمور بتمشي بشكل طبيعي أكثر.
في الختام، ما هي الرسالة التي تود توجيهها لجمهورك ومحبي الأدب؟
.رسالتي ليهم هي دايما خليكوا قريبين من القراءة والكتابة لأنها أكثر حاجة بتغني روح الإنسان، وبحب أشكر كل حد دعمني، وإن شاء الله اللي جاي هيكون أحسن وأقرب ليكم.
إرسال تعليق
اذا اعجبتك جريدتنا الرجاء وضع تعليق يسعدنا على تقديم المزيد