*اعذريني ..*
اعذريني ، بإني مش قادرة اوصفك
حروفي عاجزة فِ القصيد
ولا قلمي قادر ينصفك
لأجل اخطائي اعذريني
اعذريني أو لوميني
بس إِوعك و الخصام ،
خصامك مرر الأيام
اعذريني و اصطفيني عن جميع الكون بحالُه
عَقليني ، عقلي طايش
قَوِمي ذلة لسانه
اعدليني إن شوفتي عقلي مايله حاله
عقلي طايش ، قومي شديلي ودانه
احضنيني لو سمعتي صوت عياط
مش دمع عيني ،
دا قلبي عيط لما يومها زعلتي مني
احضنيني ، قلبي خايف طمنيني
حبيبتي زعلك لو تزيدي
يتبدل دمي دموع
يتَّقِل العياط وريدي ، لو تكوني سايبه ايدي.
هاتي يمَّا الإبرة ديا
الضميها بخيط حنانك
خيطيني بصوت دعاكي
خففي الوجع اللي فيا
خففيه يمَّا برضاكي
استحمليني ،
إوعي تقولي رامية طوبتي
عارفة بإني زهقتك ،
بس متقوليش زهقتي
دانتي أمي،
شايلة همي ،
لو يفيض بيا تضمي
لو يضيق الكون عليا
تبقي أوسع كون يساعني
بلاش تلوميني و اعذريني
و إوعي يمَّا تشيلي مني ،
والاقيكي تخاصميني
احضنيني و احتويني
طبطبي دايما عليا
اصطفيني و فضليني ،
عن جميع الخلق ديا
فيكي الألف أمني ف أيامي ،
الألف أصدق أحلامي
ميم علشان ملجأ ليا ،
من كل آلامي .
و ألف تاني
بتشهد إنك ،
أجمل أفكاري وألواني
و نون بتأكد انك نجمة، بتضوي سمايا
و انك نعمة ، وانتي نعيم ربي ف دنيايا
و ال "ي" معلش،دي ياء ملكية
بتثبت إنك كل ما ليا ،
طلبتك من ربنا أمنية
بعتك ليا ف شكل"أماني"
*-حبيبة فايز*
إرسال تعليق
اذا اعجبتك جريدتنا الرجاء وضع تعليق يسعدنا على تقديم المزيد