مساء الخير أو صباح الخير أينما كنتم، مصطفى صلاح الدين الفنان الكوميدي الصاعد وبعد تمسك بالحلم وعزيمة وإصرار جبار من مصطفى عاد بقوة في أقوى وأمتع المسلسلات على الإطلاق، مسلسل 'الكبير أوي'
مصطفى أنت بدأت في التمثيل من سنة 2015 منذ دخولك الجامعة بعدها بدأت كمان تتفرغ للتمثيل تمامًا وترك مهنتك اللي هي هندسة ديكور، طيلة السنوات الماضية كنت بتدرج في المسرح أيه بقى اللي حصل وجد عليك علشان يتم اختيارك للمشاركة ولو بمشهد بسيط في مسلسل الكبير أوي الجزء السابع؟
أيه اللي جد عليك من حيث التطوير والشغل على نفسك اكتر؟
انا من صغري بتمني اني اكون ممثل ده كان حلمي و دايما كنت بسعي ان الحلم ده يتحقق ..كان عندي هوس بالتمثيل و التصوير و المسرح ..و دايما بسعي و بشتغل على نفسي علشان حلمي ده يتحقق
انا حتي دايما بتخيل ان في المستقبل هبقي فنان كبير و موثر
انا في مره كنت ماشي مع صحابي في الشارع و شفنا البوستر بتاع الكبير اوي 6 ..ساعتها و قولت لصحابي ان هيجي يوم و همثل في الكبير اوي ..خدوا كلامي وبستهتار.. بس ساعتها ده كان حلمي و متخلتش عنه .. و فعلا اتحقق و ظهرت في الكبير اوي 7.
نبدأ بقى ببداية الحدث كله وهو اختيارك للتمثيل في المسلسل، احكي لنا كيف تم اختيارك للمسلسل أو الموضوع جه إزاي ؟
انا دايما بسعي و بجتهد في الورش و الدراسه و دايما واثق ان ربنا هيكرمني ..و دايما بروح مكاتب كاستنج ..و الحمد الله تم اختياري للدور ده.
بما إنه المشهد اللي شاركت فيه كان مع الفنان الكبير احمد مكي، والكومديان العظيم بيومي فؤاد، وكنت مخبي عندك في القهوة استاذ بيومي، أول لقاء بقى كان إزاي وفين، وظبطوا المشهد إزاي؟
ديه كانت من اسعد لحظات حياتي اني وقفت قدام الفنانين العظماء دول.. احنا اتقبلنا في اللوكيشن ..و الاستاذ مكي قالي ان هيكون ليا مستقبل كبير في التمثيل و الكوميديا.. و ديه اجمل و اعظم شهاده خدتها في حياتي بجد.
اللقاء العظيم بينك كشخص عاشق الفنان إسماعيل بس وفنان صاعد ايضًا وبين الأستاذ العظيم واللي يعتبر اشطر وأشهر كوميديان في مصر الأستاذ بيومي فؤاد كان إزاي، يعني تخيل اتنين فنانيين بيجري في دمهم كوميديا اللقاء كان ازاي؟
انا من صغري بتفرج على افلام اسماعيل ياسين و عشقت التمثيل بسببه هو فنان عظيم ..رحمه الله عليه.. الاستاذ بيومي فؤاد هو ايقونه من ايقونات الكوميديه و مصدر بهجه في اي مكان.. كانت منبهر بيه جدا و بشخصيته هو انسان جميل فعلا.
كمهندس ديكور وحياتك كلها فن من ناحية التمثيل مرة ومن ناحية الديكور مرة، يا ترى ممكن نلاقيك دامج الاثنين مع بعض في عملٍ ما؟
اتمني جدا الصراحه.. لاني لما اختارت كليه اختارت كليه تنمي الفنان الي جوايه و تراعيه.. و ده لو حصل هيبقي من اعظم الاعمال الي في حياتي ..و باذن الله يحصل ربنا كريم جدا
مصطفى من النماذج المشرفة دايما مش بس التمثيل لا وكمان الحياة، وهو في تريكة كدا جميلة بتبعر عن صبره كفنان له ٧ سنين ومش بيعمل حاجة غير التمثيل على خشبة المسرح، مزهقتش يا مصطفى أو قلت لا أنا خلاص هرجع لشغلي كمهندس ديكور، ومش عايز أمثل، وإلى أخره يعني؟
الحمد الله عمري ما حسيت بكده انا متمسك بحلمي لان دايما واثق ان ده الطريق الي ربنا اختارهولي و باذن الله هنجح فيه و هيكرمني لاني دايما بسعي و بجتهد و باذن الله الفرص تجيلي و اثبت نفسي اكتر و اكتر
مصطفى كلمتك بقى للجمهور ولينا:
كلمتي للجمهور ان محدش ابدا يتخلي عن حلمه و دايما كل واحد يسعي لتحقيق احلامه و يجتهد و ربنا عمره ما بيضيع تعب حد
و كلمتي ليكم.. انا بشكركم جدا علي الحوار الجميل ده و علي اسئلتكم المميزه.
كتبت هدى شطراني
جريدة حبر الحياة
إرسال تعليق
اذا اعجبتك جريدتنا الرجاء وضع تعليق يسعدنا على تقديم المزيد